ELA, LAB, eta STEE/EILAS sindikatuek sektore publikoko 100.000 langile lau orduko lanuztera deitu dituzte biharko, Euskal Autonomia Erkidegoan, sektore publikoan egiten ari diren murrizketen aurka egiteko. Bada, eskualdean ere eragina izango du deialdiak, hainbat udal edota ikastetxetan bat egin baitute deialdiarekin.
Lau orduko lanuztea 11:00etatik 18:00etara bitarteko ordutegian egingo da, sektore bakoitzean lan txanden arabera. Halaber, lanuztearekin batera, manifestazioak ere deituta daude EAEko hiru hiriburuetan. Donostiaren kasuan, 12:30ean abiatuko da Boulevardetik, eta bertaratzeko deia egin diete sindikatuek eskualdeko langileei.
Tolosaldeko udal ugaritan egingo dute lanuztea, eta baita ikastetxeetan ere. Tolosako Samaniego ikastetxearen kasuan, irakasleen %40k egin du bat deialdiarekin, beraz, bertako ordezkariek geeletan ezingo dela ohiko funtzionamendua bermatu adierazi dute. Hori bai, Haur Txokoa, garraio zerbitzua, Lagunbusa eta jangelak ohikotasunez jardungo dira.
Osasun zentroen kasuan, ez dute bozketa orokorrik egin, eta norbere esku dago, beraz, lanuztearekin bat egitea.
Deialdiaren arrazoiak
Mariano Rajoiren abenduaren 31ko dekretazoa eta Patxi Lopez Euskal Autonomia Erkidegoko lehendakariaren urtarrilaren 10eko dekretazoaren ondorioz «egongo diren murrizketengatik» egin dute lanuzte deialdia.  Soldatak izoztea, pentsio fondoetara ekarpena, errelebo kontratua eta jubilazio primak suspendituta geratzea bajak bere osotasunean ez konpentsatzea, ordezkapenak ez egitea, enplegu berriak sortzeko aukerak mugatu, lanaldia luzatzea, 65 urtetik gorakoek ezin lanean jarraitzea eta adinagatiko lanaldi murrizketa suspenditzea dira murrizketen ondorioetako batzuk sindikatuek adierazitakoen arabera.