Goiztiar ekin diote Abaltzisketako txantxoek euren zereginari. Goizeko zortzietan plazan elkartu da hamaika lagunez osaturiko taldea. Batetik, zortzi txantxoak alkandora eta galtza zuriz jantzita, gorbata beltza, gerriko gorria eta bi zapi sorbaldan gurutzatuta, dotore. Eta, horiekin batera, saskia daramana eta nagusia. Musika jarriz, berriz, soinu jolea.
Lehenengo makil dantzak Orendain aldera geratzen diren baserrietan egin dituzte. Pare bat orduz baserritarrei ikuskizuna eskaini ostean, gosaltzera abiatu dira indarberritzeko. Ederki jan eta edan ostean jarraitu dute ibilbidearekin.
Amezketan, talaiak
Abaltzisketan ezezik, Amezketa aldean ere izan da makil hotsa entzungai. Bertan ere, abaltzisketarren antzeko dantza egin ohi dute inauterietan. Hauen jantzia desberdina izan ohi da, eta doinu bera erabiltzen duten arren, dantza arinagoa izan ohi da.
Bada, hauek ere zortzietarako hasi dira dantzari, eta bi taldetan banatuta egin dute baserrietako ibilbidea. Herri bateko zein besteko baserritarrek oso gustura hartu dute dantzariek eginiko bisita.
