Herri arteko eta eskolen arteko txapelketak jokatuko dira gaur eta etzi

Gipuzkoako Herri arteko Txapelketa final laurdenetara iritsi da. Eskualdetik bi ordezkarik jarraitzen dute bizirik: Bidegoianek eta Berrobik. Kanporaketa gaindituz gero, gainera, elkarren aurka ariko lirateke finalerako lehian. Aurrez, ordea, Bidegoianek Azkoitia kanporatu beharko du, eta Berrobik Andoain. Joaneko lehiak gaur jokatuko dira, Azkoitian 22:00etatik aurrera eta Andoainen 21:00etatik aurrera. Itzulerako partidak, ziurrenik, hurrengo ostiralean izango dira.
Nafarroako eskolen arteko pilota txapelketari dagokionez, Areson finalerdietako partidak jokatuko dira hilaren 10ean, etzi. Eguraldi txarra eginez gero, lehia hauek Leitzako Amazabal pilotalekuan jokatuko dira.
Gipuzkoako Erremonte Kopa
Foru aldundiak, Euskal Jai Berri Erremonte Federazioarekin batera III. Erremonte Kopa antolatu du. Txapelketan hiru bikote ariko dira, eta horien artean dago Patxi Zeberio elduaindarra. Zeberio II.ak Ionekin osatuko du bikotea, eta Urriza-Etxeberria III.a eta Etxabe-San Miguel izango dituzte aurkari.
Gipuzkoako Erremonte Kopa bihar hasiko da, 11:00etan, Lazkaon. Zeberio IIa. bertan egongo da, txapelketako lehen partida jokatzeko asmoz. Hiru bikoteren artean ligaxka jokatu ondoren, bi lehenengoek finala jokatuko dute Zestoan, hilaren 29an.