Gordailua | XIV ORDUAK Atal honetarako RSS jarioa

Eguraldiaren aitzakiarik ez da izan 2012ko XIV Orduak egiteko. Parte hartzaileek eta antolakuntzak bat egin dute proba egiteko giro bikaina izan dela azpimarratzerakoan. Jon Ormazabal probaren koordinatzaileak azaldu duenez, «eguraldi aproposa egin du mendian ibiltzeko. Haize pixka bat izan da, eta goizean fresko eta tenperatura politarekin abiatu dira mendian ibiltzeko». Eguerdian pixka bat berotu duela esan du Ormazabalek, «baina ez da gehiegikeriarik izan, eta garai horretan Ata eta San Migel inguru horietatik ibili dira mendizaleak, eta hor basoguneak daude. Nik uste dut hobeagorik ez dagoela eskatzerik. Ohi bezala, Santa Klarara eraman ditugu arrautzak, eta dirudienez funtzionatu du». Ormazabalek gaineratu duenez, «balantze orokorra, baikorra da». Ibilbidea nahiko ondo zegoela nabarmendu du Ormazabalek: «Leku ospeletan bazen lokatzik, baino guk espero genuena baina askoz ere gutxiago. Joan den ostiralean hego haizeko bero errea egin zuen eta horrek nahikoa lehortu du bidea». Horren froga izan da  mendizaleak ez zirela asko zikindu. Guztira 2.378 mendizalek eman zuten izena parte hartzeko, 1.925 gizonezko eta 453 emakumezko, baina, atzo, Berazubitik atera zirenak 2.209 izan ziren, horietatik 1.792 gizonezkoak eta 417 emakumezkoak. 20:30ak aldera 1.800 parte hartzaile iritsi ziren dagoeneko Berazubira. Azkeneko parte hartzailea 20:00ak inguru pasatu zen Amezketatik. Orain lau urteko probarekin alderatuta ibiltari gutxiagok parte hartu [...]

Elena Vidales Goitia tolosarra San Migeleko Gurutze Gorriaren postuan izan da osasun tekniko gisa mendizaleak artatzen. Noiztik zaude San Migeleko postuan? Goizeko hamarretan iritsi gara, muntatu dugu denda eta ordutik aurrera hasi gara lanean. Nola etorri zaizue jendea Gurutze Gorriko dendara? Hasieran jendea orokorrean oso ondo etorri da. Etorri direnak pixka bat minberatuta zeuden, kontrakturaren bat edo, eta lasaigarria eman zaio. Baten bati masajea ere eman zaio, muskulu bikiak igo zaizkiolako. Jende gehiena etorri da batez ere babekin eta oinak egosita zituela. Babei eta oina egosita dituztenei zer tratamendu ematen diozue? Baba osoa baldin badauka, jarraitu ahal izateko, baba ziztatu, likidoa atera, desinfektatu, eta gero esparatrapuarekin bildu eta baselina ematen diogu. Zerbait larririk izan duzue? Orain arte [14:00] izan dugun kasurik larriena pertsona bati digestioa moztu egin zaiola izan da. Tentsio baxuarekin etorri da. Medikuak ikusi du eta frogak egin dizkiote: elektroa, tentsioa hartu, azukrea begiratu… Tratamendua eman dio eta probatik erretiratu egin da. Zenbatek osatzen duzue Gurutze Gorriko taldea? San Migelen mediku bat, bi erizain eta sei osasun tekniko gaude. Denak gara boluntarioak. Gero, dena jasotzen dugunean, hemendik Berazubira joango gara, eta han berriz muntatuko dugu denda eta dena prest uzten dugu jendea iristen denerako.

Mila Goikoetxeak hirugarren aldia du XIV Orduetan boluntario lanetan ari dela. Tolosarra da izatez, eta egun Gorritin bizi da. Gorritikoa da Itziar Zugasti eta lehenengo aldia du boluntario gisa ari dela. Biak Gorritin aritu dira anoa postuan laranjak …

  Aurrera doa XIV Orduen proba eta une honetan jendez gainezka dago San Migel. Bai ibiltariak eta baita hauekin tarte bat egoteko joan diren bere senide eta lagunak ere elkartu dira baseliza inguruko anoa postuan. Eguraldi ona dago: eguzkitsua, baina aldi berean nahiko freskoa. Mendizaleek diotenez, Lekunberriren aurretik bero handia izan dute, eta eskertu dute Lekunberritik San Migelera bitarteko basoaren itzala. Indarrak berreskuratzen ari dira mendizaleak, Igaratza alderako bidea hartu aurretik. Ura erruz banatzen ari dira, besteak beste. 13:30ak inguru elkartu da jende gehien San Migelen. Mendizale batzuk 10:30erako iritsi dira bertara, eta zain egon behar izan dute zigilua jartzeko, oraindik ez baitzen bertatik igarotzeko kontrol-ordua. Bestalde, San Migelerako errepidean 2 orduz autoak geldituta egon dira, bertatik igaro den martxa zikloturista dela eta. Mendizaleek San Migeletik Gaurdetxerako bidea baso aldetik egin behar dute, txirrindulariekin arazorik ez izateko.