Etiketen Fitxategia | gazteak

Abenduan beti urteurrena ospatzen dute Alegiako Gaztetxean, baina aurtengoan bereziagoa da: 25 urte bete dira tren geltokiko biltegi zaharra okupatu zutenetik. Eta bertan dago oraindik. «Leku berean jarraitzen duen gaztetxe zaharrenetakoa da», esan  du Txarli Gesteira bertako kideak. «Urte gehiago dituenak badaude, baina lekuz aldatu izan dira». Alegian beste gauza asko bezala, Tontokalen sortu zen gaztetxearen txinparta. «Jende guztia hor biltzen zen, eta ikusten zen beharra gazteak leku batean elkartu eta gauzak antolatzeko», dio Gesteirak. «Urtebete lehenago, 1986an, Ziklox Garaialde musika taldea sortu zuten herriko gazte batzuk. Hiltegi zaharra hasi ziren erabiltzen, orain dagoen kiroldegiaren aurreko bulebarrean zegoena, baina eraikina bota egin zuten. Eta pentsatu zuten tren geltokiko biltegi zaharrean sartzea, eta horrela egin zuten 1987ko abenduan». Imanol Aranburu gaztetxeko kideak gaineratu duenez, «gazte asanbladak lokal bat eskatu zuen aurretik udaletxean, baina ez zioten kasurik egin eta eraikina okupatzea pentsatu zuten». Lehenengo hilabeteak txukuntzen aritu ziren: zaborra atera, margotu, eszenatokia muntatu eta ekitaldiak prestatzen hasi ziren. Gaztetxea oso lotua izan da musikari eta kontzertuei, batez ere aurreneko urteetan. Okupazioa dela eta, tentsioak bizitu ziren herrian. Sei gazte inputatu egin zituzten, baina azkenean eraikinaren jabea zen Renfe enpresak atzera bota zuen salaketa eta bertan behera geratu zen epaiketa. «1994an udalak eraikina [...]